По благословению Преосвященнейшего Владимира, епископа Шадринского и Далматовского, священноархимандрита Успенского Далматовского мужского монастыря

 

Служба и акафист прп. Далмату Исетскому

СУЖБА И АКАФИСТ

преподобному

ДАЛМАТУ Исетскому чудотворцу

На велицей вечерни

На Господи воззвах, стихиры, глас 6:

Ныне отложим, братие, /всякое мирское попечение /и припадем к стопам преподобнаго отца нашего Далмата, /старца праведнаго, /и умилимся и воззовем: /преподобне отче Далмате, /не отвержи нас, ищущих твоего старческаго утешения, /не отрини нас, грешных, уповающих на тя, /совершающих ревностию святую память твою.

Подаждь нам десницу свою умудренную /и от рова страстей изведи, /от мрака грехолюбиваго отжени /и от всякия скверны очисти. /Собери нас, расточенных, во обитель твою, /к раце мощей твоих, /яко же в некий новый Силоам, /и омый очеса наша, /да прозрим от слепоты духовныя.

Необымена страна Сибирская, /богатящаяся ликом угодников святых, /светильники всесветлыми землю нашу освещающими, /в ней же процвете преподобный отец наш Далмат, /Взбранной Воеводы заступлением обративый к смирению врага, /благовестия Христова сущее исполнение.

Сии на конех и сии на колесницах /покоряху страну Сибирскую /и обтекоша ю до последних моря, /алчуще богатства и славы. /Но истинный боголюбец наш Далмат, /наследова землю сию во имя Господа Бога нашего: /блажен сый, якоже един от лика кротцых, /яко Господь не оставит преподобных своих.

Мнози сподвижницы твоя /тогда огнем жегомы изомроша, /инии пленицами агарянскими вязашася, /но никакоже коснушася напасти сии тя, /чудесне бо спаслся еси, /отроком в пещи вавилонской подобяся. /Темже и святыня твоя пребывает доныне, /рака мощей твоих, сокровище многоценное.

Ныне грядет время Страшного Суда, /ныне вся Русь ко Христу призывается, /дати ответ праведному Судии, /аще не бы имела мнози заступницы, /велий сонм святых в ней просиявших: /святителей, преподобных и праведных, /священников, монахов и мирских, /страстотерпцев и Христа ради юродивых, /повсюду обретшихся. /Но молитвами их и преподобнаго отца нашего Далмата, /земли Сибирстей несравненна ходатая, /да отверзет Господь нам на малое время двери покаяния.

Слава, глас 1:

Наследниче предания духовнаго, /его же приял еси от Иоанна, /ученика дивнаго старца Дорофея, /любовию к Богу пламенея, /ополчился еси противу духов злобы поднебесныя, /мечь духовный — молитву победительную — приял еси, /еюже и сокруши врази числом и подобием праха пустыннаго, /егоже возметает ветр от лица земли, /ратоборче святый, /закон Господень исполнивый.

И ныне, глас тойже: Всемирную славу…

Чтения три общая преподобным

На литии стихиры:

глас 6: Необымена страна наша Сибирская… (см. стихиры на Господи воззвах)

глас 2: Свидетели вернии, чадца духовная, /приидите купно со блаженным Исааком /согласно воспоим славу преподобнаго отца нашего Далмата, /новаго небожителя, /вся бо мирская оставивый, /чая Бога, спасающего от малодушия и от бури, /в пустыни Исетской вселивыйся, /яко в земли обетования, /рай приснопеваемый обретаяй.

Слава, и ныне, глас тойже:

Царице Небесная, /Мати Христа Бога нашего, /землю нашу освящающая, /и милостивно слух Свой к молитвам нашим преклоняющая, /внемли мольбам преподобнаго отца нашего Далмата, /и якоже древле помози нам, /да избавит Господь землю Русскую /от бездны сатанинския /и спасет нас, яко милосерд.

На стиховне стихиры, глас 4:

Скорби и печали наша почти, /отче наш Далмате, /не остави нас, уповающих на тя, /от сна греховнаго пробуждаемых, /и благоуветливостию образа твоего озаряемых, /жезл веры нам показующе, /на негоже опираяся, /Царствия Небеснаго достигл еси, /десницею своею благословляющи нас.

Стих: Честна пред Господем  / смерть преподобных Его.

Горькия воды Мерры жития сего /услаждая росою молитв твоих, /всякую клевевету потребляя, /горечь века сего преходящаго, /якоже желчь со оцтом вкусивый, /навета о себе правителем земным никакоже устрашися, /затвора не оставил еси, /смиренномудрием сокрушая козни врага.

Стих: Что воздам Господеви, / яже воздаде ми.

Воспоим вернии, /блаженное успение отца нашего Далмата, /долготе жития его многотруднаго презельне удивляющеся, /како толику старцу сущу мнози подвиги сотворил еси, /обитель и сущих в ней устрояя ко спасению, /Антонию и Макарию древним уподобляяся.

Слава, и ныне, глас 8:

Царице Небесная, Мати чадолюбивая, Владычице, /взыщи расточенная чада Твоя, /убогия и сирыя, /к Тебе, последнему убежищу, взирающе, /знамений милости Твоея чающия, /и веру православную ревностно хранящия, /Руси святыя наследие неисчерпаемое.

Тропарь, глас 2: Дивный и славный угодниче Христов, /славы и почестей всяческих бегая, в пустыни Исетской вселился еси, /созидая в молитвах обитель твою, /аки стены Иерусалимския, /заступничество Царицы Небесныя чудесно обрел еси, /страхом Божиим к стопам твоим повергая бывшаго врага /и вновь воздвигни сердца наша, отступлением оскверненныя.

Ин тропарь, глас 4: Подвигом добрым подвизався, /постом, бдением и молитвою любовь Христову стяжав, /чудным заступлением Божией Матери /угрозы агарянския в ничтоже вменив, и просиял еси, яко светило на тверди небесней, /преподобне отче наш Далмате, /моли Христа Бога спастися нам.

На утрени

На Бог Господь:
тропарь святаго, дважды.

Слава, и ныне: Богородичен, глас 2:

Иконы Твоея, Владычице, /пресветлое начало озаряет преподобнаго отца нашего Далмата, /той же ю от веси Невьянския вземши /и с нею преславне путешествуя, /поставив оную во основание великия обители, /знамением ея всех врагов победи, /и ныне сохрани ны благодатию Твоею, Пречистая.

По первой кафизме седален, глас 2:

Кончину твою светло празднующе, зрим неисчетныя подвиги твоя: посты, бдения и пламенныя молитвы, имиже достизаше небеси, чудно освящая землю нашу, идеже чтится память твоя, достоблаженне Далмате.

По второй кафизме седален, глас 2:

В книзе жизни суть имена всех, угодивших Тебе, Господи, идеже преподобный авва наш Далмат светло красуется красотою неизреченною, и молится Тебе за люди своя присно.

На полиелее седален, глас 2:

Егда наста время прославити тя, кормче и духоносче Далмате, да явиши велия в людех твоих исцеления и прозрения, но людие твои предпоследнии егда прославляше тя, явлению твоему не вероваша, в немже явишеся к тебе Сергий Преподобный со инеми небошественники, моли Христа Бога не лишити нас сретения твоего во Царствии Небеснем.

Прокимен, глас 8: Восхвалятся преподобнии во славе / и возрадуются на ложах своих.

Стих: Воспойте Господеви песнь нову, яко дивна сотвори Господь.

Евангелие от Матфея, зачало 43:

Рече Господь Своим учеником: Вся мне предана суть отцемъ моим: и никтоже знает сына, токмо отец: ни отца кто знает, токмо сын, и емуже аще волит сын открыти. Приидите ко мне вси труждающиися и обремененнии, и аз упокою вы: возмите иго мое на себе и научитеся от мене, яко кроток есмь и смирен сердцем: и обрящете покой душам вашим: иго бо мое благо, и бремя мое легко есть.

По 50‑м псалме, стихира, глас 6: Приидите, христолюбцы и вси вернии, /восхвалим преподобнаго и богоноснаго отца нашего Далмата, /всем сердцем возлюбившаго Христа /и Его Пречистую Матерь со всеми угодники Божиими, /ихже лику ныне причислен еси, /непрестанно ходатайствует о душах наших.

КАНОН

преподобному

ДАЛМАТУ Исетскому чудотворцу

Глас 1

Песнь 1

Ирмос: Твоя победительная десница, /боголепно в крепости прославися: /та бо, Безсмертне, /яко всемогущая, противныя сотре, /израильтяном путь глубины новосоделавшая.

Припев: Преподобне отче наш Далмате, моли Бога о нас.

Како воспоем песнь на земли чуждей, — в горести взывали суть древле иудеи. Како и мы воспоим славу преподобнаго отца нашего Далмата боголепнаго, не имущи ныне доброты духовныя; но прильпни ныне язык к гортани моему, аще не воздам тебе похвалы, угодниче Христов.

Якоже оный Давид, предъизбранный от стад овчих на служение царское, да упасет Израиля помазанный, такожде и ты, отче, благочестия взыскав, мир сей со страстьми и похотьми остави; темже и победи сего Голиафа мысленнаго, царственное служение духа — иночество преславное обрел еси.

Слава: Лествицею сею к Богу праведне восхотев, еюже на Небо возшел еси, возложи на Господа печаль твою, не остави нас, уповающих на тя, отче преподобне.

И ныне: Мати Пречистая, краса земли святорусския, призри на нас, грешных и убогих, с высоты небесныя купно со отцем нашим преподобным Далматом и воздвигни нас от худоверия к славе святей.

Песнь 3

Ирмос: Едине ведый человеческаго существа немощь, /и милостивно в не воображься, /препояши мя с высоты силою, /еже вопити Тебе, Святый: /одушевленный Храме /неизреченныя славы Твоея, Человеколюбче.

Из града Тобольска пришел еси и ко обители первей твоей, яже во Невьянске, прилепился еси, на высоту добродетелей прескоро восходя; тамо же братии, притекающей к тебе, жалостию ко всяческим обдержим, слово на пользу преподаше, от нихже подвижниче и наставниче богомудрый нарекийся.

Усумнился еси в почитании оном, не от человек ища славы временныя, но от Господа ища благ вечных, далече во страны Калмыцкия и Кайсацкия устремился еси, да почерпнеши тишину Божественную, яже от безмолвия глубоководнаго проистекаемую.

Слава: Землю пришествия твоего, в нейже досаждаем от нечестивых, всю росою молитв твоих покрыл еси, Богу вопия: скажи ми, Господи, путь, воньже пойду, яко к Тебе взях душу мою, — тайны и свидения Божия спасительныя проразумевая.

И ныне: Спаса Христа нам неизреченно рождшая, Егоже возвестившая и воспитавшая, Емуже наипаче спострадавшая, тишиною божественною нас обыми.

Ин кондак, глас 4: От юности Христа возлюбив, /оставил еси суетная мирская мудрования; /мужески в пустыню вселился еси /и победил еси вся прилоги вражия. /Темже и вселися в тя Пресвятый Дух, /Имже точиши чудеса обильно; /не презри наша к тебе моления /и поминай верою чтущих тя, /Далмате богодухновенне.

Седален, глас 2:

Возждав воды живой, яко елень на источницы водныя, поспешил еси к месту подвигов твоих, благодать и покой обретая от Господа всяческих; нетлением процвел еси в пустыни Исетской и возвысился еси, нас, алчущих, насыщая виноградом чудес твоих.

Слава, и ныне: глас той же: Настави мя на путь покаяния, уклоняющагося к беспутию зол, и Преблагаго прогневляюще Господа, Неискусобрачная Благословенная Марие, прибежище отчаянных человеков, Божие пребывание.

Песнь 4

Ирмос: Гору Тя благодатию Божиею приосененную, /прозорливыма Аввакум усмотрив очима, /из Тебе изыти Израилеву провозглашаше Святому, /во спасение наше и обновление.

Недоумеваю, како молился еси, преподобне отче, да открыет Господь место вселения твоего. Земли воздымающейся и Исети-реце бурлящей, но не зде Господь, якоже Илии знаменовася в явлении: егда достигл еси Белаго Городища, вострепета душа твоя во хладе ветра тонка и в воскликновении сердца твоего: зде Господь! — камнем обрелось бе обители краеугольным твоея.

Идеже стоясте нози твои светолепныя по всей земли Исетской, тамо храмы воздвигоша людие Божии по времени. И ныне обнови сердца наша недостойныя, наследия твоего не отвращающихся.

Слава: Кто сравнится в земле нашей со славою твоею, дивный угодниче и старче преблаженне, купно с праведным Симеоном и страстотерпцами рода царскаго, веси и грады Уральския осияюще, лучезарныя светильники Бога новочудесныя.

И ныне: Из Тебе произыде Слава всякия славы — Сладчайший Иисусе, Бог всех, — Преизящнейшая Дево, Пречистая Богородице, тем Тя боголепно величаем.

Песнь 5

Ирмос: Просветивый сиянием пришествия Твоего, Христе, /и освятивый Крестом Твоим мира концы, /сердца просвети светом Твоего богоразумия, /православно поющих Тя.

Нищетою духа крайнею обогативыйся, образом Илииным и Предтечевым многажды насыщаяйся, оным подражая, в пещере подвизался еси, сам бо образ боголепный православным явился еси.

Землю в вечный удел от Царицы Небесныя получил еси и заступлением свыше уязвил еси сродника твоего чужевернаго, пострадавый от нечестивых многажды, темже помяни и нас, чтущих святую память твою.

Слава: Рать Небесная, Русь Святая, приими хвалы наша новому оружнику твоему, преподобному отцу нашему Далмату; яко прохождение его видяще, славу его со отцы нашими Сергием и Серафимом и иными многими воспеваем.

И ныне: Мати Пречистая, Дево Преблагословенная, речения Твоя о смирении Твоем Отцу Небесному сладкою росою благодати Божией пустыню сердец наших напаяют и крином надежды и любви произрастают выну.

Песнь 6

Ирмос: Обыде нас последняя бездна, /несть избавляяй, /вменихомся яко овцы заколения. /Спаси люди Твоя, Боже наш: /Ты бо крепость немощствующих и исправление.

Прости нас, угодниче Христов, и помолись о нас, да егда услышиши скорбь душ наших о разорении обители твоея. О неистовство нечестивцев новейших, паче всех древних превосходящее! Кто воздвигнет и спасет нас ото рва погибельнаго, аще не Бог, Дивный во святых Своих.

Якоже глубины сатанинския, неизследуемы бездны грехопадений моих, но подобна херувимстей и серафимстей слава твоя, отче благословенне; ныне подаждь ми десницу твою крепчайшую, да восстану аз.

Слава: Предстоя престолу Святыя Троицы, зриши на земли сущия, к тебе, отче, воздыхающия, верныя и неверныя, прежния и новыя, первыя же твоя и последния, не забуди нас, уповающих на тя.

И ныне: Купино Неопалимая, Богомати Пречистая, из Тебе бо произыде Огнь Божества, неопально врачуяй опаленныя грехом души и телеса наша.

Кондак, глас 2: Молитвами и верою обитель свою оградивый, /землю Исетскую изрядно преобразивый, /блаженным успением честное старчество запечатлевый, /явлением мощей твоих нас не оставивый, /отче наш преподобне Далмате, /и ныне предстани и заступи чтущих святую память твою.

Икос, глас 2: Пришествие в видении некоем к тебе и сыну твоему препрославленнаго Сергия и иных святых чудотворцев устрои тебе Господь; небесное прославление и пир сотвори, яко единому от возлюбленных Своих, отче досточудне и доброзрачне, отложил еси прославление твое земное на конец времен; слезами умиления и тайнозрением нас восхищаяй, и ныне предстани и заступи чтущих святую память твою.

Песнь 7

Ирмос: Тебе, умную, Богородице, /пещь, разсмотряем вернии: /яко же бо отроки спасе три Превозносимый, /мир обнови во чреве Твоем всецел, /хвальный отцев Бог и препрославлен.

Научи нас подражати тебе малым чим, росою духа и чудес твоих нас обогащающе, авво и похвало Исетская; наипаче славити тя, не имущим к тебе воздаяния, утешителю многим в житии и по успении твоем, присноблагостне.

Да озвездятся вси концы земли славою твоею, да помянут люди русския, каковаго имут заступника себе, много возлюбившаго ближняго своего, грешником не гнушаяся, но паче наздание и вразумление, и всякому в скорби милование подаваяй.

Слава: Да паки воздвигнется святая обитель твоя, в нейже рака мощей твоих, преподобне, яко некий благоуханный крин является, да от мраза страстей святым лобзанием согреваемии, князя тьмы отбежим далече, твоима крилома покрываема.

И ныне: Солнца незаходимаго Мати, светом божественным просвети мрак души моея, да избавлюся вечнаго осуждения.

Песнь 8

Ирмос: В пещи отроцы Израилевы, /якоже в горниле, добротою благочестия /чистее злата блещахуся, глаголюще: /благословите вся дела Господня, Господа, /пойте и превозносите во вся веки.

Шеломом твоим людие исцеляшеся, купно и кольчужницею, и посохом, овии Елисееве милоти подобяхуся, яже от Господа восприял еси чудеса сии, отче преподобне, благодати дар тяжце востязуемый показуя, Духом Утешителевым желая общницы нас себе совокупити.

Невозможно, аще кто и восхотел бы, изрещи вся, яже претерпе от худоверных и злых, языка непреподобна; и словес не имамы о трудех твоих, и молитвы твои несть умения исчести, наипаче чудеса и цельбы, и видения твоя, отче многочудне.

Слава: Старость твоя мастита и добродетельми преиспещренна, дарами Духа Святаго преукрашена, упокоение твое с похвалы многими и свято, заступление твое неотъемлемо от нас, слава твоя на Небесех выну благоухающа: не остави нас до конца, молящихся тебе.

И ныне: Обнищавшее естество наше Сын Твой обнови, Богородице Пречистая, и водрузи е в раи сладости, идеже вси святии прославляют Его со Отцем и Духом.

Песнь 9

Ирмос: Образ чистаго Рождества Твоего, /огнепалимая купина показа неопальная: /и ныне на нас напастей свирепеющую угасити, молимся, пещь, /да Тя, Богородице, непрестанно величаем.

Якоже оному Иакову в видении сам явился еси на праздник твой пресветлый, праведниче и небошественниче наш, со други божественными твоими, святители и чудотворцы препрославленныя, ихже сретил еси с преподобным Исааком, отраслию твоею превосходнейшею, и нынешнее прославление твое такожде небоявленне сотвори.

Не помяни беззаконий наших, старче преподобне, милуяй и питаяй приходящих к тебе; веру нашу укрепи и вся темная зверовидная потреби, яже от прилога диаволя в душах наших насаждаемая.

Слава: Благочестно память твою празднующе, буди нам истинным путевождем ко спасению, неистовство душ наших изглаждая, коегождо посещая чад твоих, ласкосердствуяй духовно и уветливостью свидений твоих избавляя нас от в пустыне блуждания и унывающих.

И ныне: Успения Твоего образ преподобнаго Далмата вдохнови, иже иконы ради Твоея обитель устрои, горния Гефсимании изоблистающь образ яви, в нейже Сын Твой и Бог наш восприял еси Тя, Надежду нашу и Упование.

Светилен, глас 2: Восстани, что спиши, земле Исетская, се свет возсия в тебе новаго светильника Божия; прииди и поклонися к нему, и возстени в покаянии из глубины души: преподобне отче Далмате, изведи нас из темницы духовныя и пленицы грехопадений наших разреши, умолив праведнаго Судию о еже спастися нам.

Стихиры на хвалитех, глас 8: Кия похвалы принесу ти, преподобне, /горце взирая на останки обители твоея, /вконец разоренныя, /прежде благоуханныя, /юже сыны противления тщеты ради Вавилонския разграбиша, /всякаго жития благочестнаго глумляшася; /но, взирая на источник чудес твоих, /мню, яко превыше объюродевших мира сего слава твоя, /преподобне, преблаженне, предивне, /достохвальне и предобре подвижниче, /светлоблаженне праведниче, досточудне и благохвальне, /неисчерпаемый источниче щедрот, /на главу верных изливаемый, /омываяй присно приходящих к тебе, /око доброзрачное, назирающее верных. /Не остави нас, верою чтущих память твою. (дважды)

Приидите, вернии, /воспоим славу преподобнаго отца нашего Далмата, /ангела земли Исетския и ея чудное основание, /в нюже вселился еси, /прежде безвидную, /дыханием молитвы твоея всю согрел еси ея /и обитель в ней Заступницы Небесныя ради создал еси; /в нейже множество иноков подвизашася, /хвалу тебе воздая непрестанно.

Преподобне отче Далмате, /земли Уральския и Сибирския похвало, /едине преподобне, /лику сему усвоившийся /и небесную славу приемый, /яже от Святыя Руси, /от Господа Сил, уготовившаго тебе обители неизреченныя, /ихже ухо не слыша и око не виде, /и на сердце человеку не взыдоша, /что уготова Господь любящим Его.

Слава, и ныне, Богородичен: глас той же:

Царице Небесная, /прииди и защити нас, сирых и убогих, /обуреваемых и поползшихся, /наследия Далматова не отвергшихся вконец, /Твоего покрова ищущих, /якоже некогда избранниче Твой Далмат, /стяжавый заступление Твое; /мы же ныне не имамы, где главу приклонити, /на всякое отступление взирающе.

На Литургии

Блаженны, прокимен, Апостол и Евангелие по обычаю службы преподобническия:

Ап.: Гал., 213 зач., V, 22 — VI,2;

Ев.: Лк., 24 зач., VI, 17–23;

АКАФИСТ

преподобному

ДАЛМАТУ Исетскому чудотворцу

Кондак 1

Избранный от воинства земнаго к воинству небесному, /в землю Исетскую от страны отечествия своего пришедый, /идеже Заступницу рода христианскаго чудесно обретый, /и в ней обитель во славу Царицы Небесныя устроивый, /восхваляем тя, чудотворче святый небодохновенный; /но яко имея дерзновение ко Господу, /от рова погибельнаго нас изведи, да зовем ти:

Радуйся, преподобне отче наш Далмате, Исетский чудотворче.

Икос 1

Ангел-хранитель соблюл еси тя, отче, до возраста мужескаго, воззва тя в угодное Богу время на житие превыше мирскаго попечения, к жизни иноческой евангельской, юже сохранил еси в чистоте и непорочности, тем освяти вся концы земли нашея, да зовем ти:

Радуйся, во граде Тобольске рожденный.

Радуйся, града Божия наперсниче вожделенный.

Радуйся, воинство земное от отца унаследовавый.

Радуйся, воинству небесному причастниче святый.

Радуйся, родителей своих достойное продолжение.

Радуйся, славы святых несумненное умножение.

Радуйся, страны Сибирския подвижниче, доселе неизреченный.

Радуйся, в меру возраста Христова скоро пришедый.

Радуйся, семьи христианския, церкви малыя, до времени не оставивый.

Радуйся, яко Бог тя на делание сие изведый.

Радуйся, земли Исетския чудесное основание.

Радуйся, покрываяй нас сиянием святым.

Радуйся, преподобне отче наш Далмате, Исетский чудотворче.

Кондак 2

Многия скорби и печали жития мирскаго приизлиха приуготовиша душу твою, но яко при источнице вод некое древо псаломское возрасташе дух твой ко Господу, Ему же измлада прилежа пети песнь: Аллилуия.

Икос 2

Время призвания твоего, отче досточудне, от мира к чину ангельскому чтим, изумевая: како кто от подвижник, седине обретенней, возможе яко елень на источницы водныя устремитися к иному жительству, аще не Господь, исправляющий стопы человеку, да зовем ти:

Радуйся, тайну призвания своего измлада хранивый.

Радуйся, промысла Божия исполнение явивый.

Радуйся, ближния своя премного удививый.

Радуйся, по успении супружницы твоея взор к небу возведый.

Радуйся, света евангельского чудесное озарение.

Радуйся, имений и чад несметных обретение.

Радуйся, якоже Авраам дом отца своего в стране Халдейстей оставивый.

Радуйся, землю обетования, якоже оному, Господь тебе даде.

Радуйся, мирское попечение по всяческим отложивый.

Радуйся, чающий Бога, якоже Давид.

Радуйся, в молитве неустанно пребывающий.

Радуйся, укрепление душ наших и сердец.

Радуйся, преподобне отче наш Далмате, Исетский чудотворче.

Кондак 3

Ища утешения духовнаго, прилепился еси к первей обители твоей, яже во граде Невьянстем, идеже зря преуспеяние твое необычное, возведе тя Бог в чин иноческий, да воспоешь Ему неведомую миру ангельскую песнь: Аллилуия.

Икос 3

Како подвизался еси, в возрасте сый, како иных превзошед послушанием и смирением, дарований духовных сподобился еси, да зовем ти:

Радуйся, отче преподобне.

Радуйся, причастниче святым.

Радуйся, ищущий подвигов духовных.

Радуйся, смиренномудрия иский.

Радуйся, мужу желаний неизреченный.

Радуйся, человече Божий среди оболкшихся с тобой.

Радуйся, многия виды послушания исполнивый.

Радуйся, яко к подвигам новым Господь тебе зовый.

Радуйся, от братии богомудрым нареченный.

Радуйся, многия к себе привлекий.

Радуйся, пищи нетленныя вкусивый

Радуйся, всего себе Богу принесый.

Радуйся, преподобне отче наш Далмате, Исетский чудотворче.

Кондак 4

Якоже исходит человек на делание свое до вечера, яже от Бога, такожде и тебе уготованное время приспе, отче; да оставив монастырь сей, явлен будеши стране незнаемей доселе и не ведущей пети: Аллилуия.

Икос 4

Егда же глубоцей молитве твоей, преподобне, явлено бысть, да отречение сотвориши игуменству своему, хотящему быти по прошении братии, ускори тя Господь к призванию новому, да зовем ти:

Радуйся, послушниче Господень неленостный.

Радуйся, умом и помышлением простый.

Радуйся, всякое тщеславие презревый.

Радуйся, смирение всему предпочтый

Радуйся, молитвою сердце свое освятивый.

Радуйся, образ Божий тамо обретый.

Радуйся, к Богу, в нас сокровенне пребывающему, взираяй.

Радуйся, повелений Его не отступаяй никогда.

Радуйся, честолюбия николиже взыскавый.

Радуйся, братии своей любы выну творя.

Радуйся, обители Невьянския духовное угобзение.

Радуйся, большая от Господа вместити могий.

Радуйся, преподобне отче наш Далмате, Исетский чудотворче.

Кондак 5

Не желая никако приобидети братию от разлучения своего, прения и разномыслия никакоже допущая, решил еси тай, Божию промыслу препоручившись, изыти к новому месту подвигов твоих, во глубине сердечней поя: Аллилуия.

Икос 5

Новыя неизреченныя ревности исполнися, блаженне, да утолится жажда сердца твоего о уединении и безмолвии, юже предпочел еси всякому назиданию, да поем ти:

Радуйся, Господа Путем живым евангельски уяснивый.

Радуйся, Ему во странствиях своих последовавый.

Радуйся, вся и всяческая оставивый.

Радуйся, блаженство нищих духом обретый.

Радуйся, молитвенниче преусерднейший.

Радуйся, волю Божию соблюдый.

Радуйся, странниче любоприятельный.

Радуйся, отшельниче благий.

Радуйся, иноче, от Бога предназначенный.

Радуйся, звание сие до кончины пронесый.

Радуйся, первопроходче мест дивиих и лихих.

Радуйся, мужества апостольскаго преисполненный.

Радуйся, преподобне отче наш Далмате, Исетский чудотворче.

Кондак 6

Кия труды приял еси, отче, егда по некоему совету удалился еси на восход солнца, водворяяся в пустыню страны агарянския; да в безмолвии сей сени смертней услышат ангели и человецы богокрасную песнь: Аллилуия.

Икос 6

Якоже воды Исети, скоро течаста нози твои, преподобне, по брегам ея; и идеже ты моляшеся, провидя селения христианския, тамо по времени храмы Божии воздвиглися бяху, да поем ти:

Радуйся, землю Исетскую молитвой своею облагоухавый.

Радуйся, к Богу ея приведый.

Радуйся, преданий церковных чудесный исполнителю.

Радуйся, отцев продолжателю прекрепок и благий.

Радуйся, стране неведомой чудное посещение.

Радуйся, освятителю мест темных и пустых.

Радуйся, на Господа надежду свою возложивый.

Радуйся, на посох веры, опершийся грядый.

Радуйся, все подвиги христианския исполнивый.

Радуйся, в молитве преуспеяние имый.

Радуйся, Белаго Городища достигнувый.

Радуйся, иконою Успения место сие освяти.

Радуйся, преподобне отче наш Далмате, Исетский чудотворче.

Кондак 7

Яко некоего Сиона достигоста стопы твоя Белаго Городища, преподобне отче, места весьма краснаго души твоей, прибежища скитанию твоему, водворившемуся в земле сей обетованней, да присно слышим о тебе: Аллилуия.

Икос 7

Древним пустынником подобяся, наипаче Блаженному Антонию Печерскому, Руси Святей первому начальнику и обители благознаменитыя основателю, ископал еси пещеру, преподобне отче Далмате, и в ней вселился еси, предаваясь подвигом неизглаголанным, да поем ти:

Радуйся, древних отцев ревнителю преизящный.

Радуйся, их подвигов наследниче живый.

Радуйся, купче, бисер нашедый многоценный.

Радуйся, оный до времени сокры.

Радуйся, тяготу и вар дневный претерпевый.

Радуйся, молитвою к Царице Небесной многоутешанный.

Радуйся, мироварнице трудов бденных.

Радуйся, купель сияющая помыслов благих.

Радуйся, пустынножителю неизреченный.

Радуйся, подвижниче непостижиме.

Радуйся, звание иноческое оправдавый.

Радуйся, стяжание духовное умноживый.

Радуйся, преподобне отче наш Далмате, Исетский чудотворче.

Кондак 8

Не для покоя вселился еси, преподобне, в места пустынныя и безводныя, но пустыня потом и трудом молитв твоих благоукрасися, да безмолвия глубоководнаго наслаждаяся и дух твой с Господом сочетавая, изнесет всякое дыхание твое: Аллилуия.

Икос 8

Аще плоть твоя увяде от поста и воздержания и пакостник плоти твоея, сей древний змий, молитв и трудов твоих устрашися, но призва сей завистник спасения нашего клеветников, яже Елигея подвизают погубити тя, отче победительне, да поем ти:

Радуйся, земли Исетския озарение.

Радуйся, оныя нечаянное прозябение.

Радуйся, землю сию облобызав, возлюбивый.

Радуйся, яко крин райский зде обитель твоя процвете.

Радуйся, Матери Божией небесное взирание.

Радуйся, благотерпеливое Ея умоление.

Радуйся, любви Божией приверженный.

Радуйся, неотлучно пребываяй в ней.

Радуйся, зерцало подвигов многочудесное.

Радуйся, мерило лучшаго пути.

Радуйся, лампадо, в пещере пустынней возженная.

Радуйся, свеще, сердца наша выну согревающая.

Радуйся, преподобне отче наш Далмате, Исетский чудотворче.

Кондак 9

Николиже почитание твое Царицы Небесныя оставлял еси, выну заступление свое от враг, видимых и невидимых, на Ню возлагаше, и икону Успения Ея, яко некую Одигитрию пред собой носящи, в ней же Сын Ея вознесшийся, нисходя прияти Матерь Свою, слышит от всех конец земли: Аллилуия.

Икос 9

О неизбывное чудо, Владычицу к себе в заступницу избра, да взбранным воеводством Ея устрашит неистоваго Елигея, якоже некогда хана Ахмета при Угре реце, и понуди прежняго врага припасти со страхом Божиим к стопам твоим, преподобне отче, да поем ти:

Радуйся, Сергию преподобному чудом равняяйся.

Радуйся, прилога диавольскаго до конца отметаяйся.

Радуйся, даже до смерти подвизавыйся.

Радуйся, яко Бог тя сохрани.

Радуйся, Царицы Небесныя чудное заступление.

Радуйся, небо к себе привлекий.

Радуйся, евангельское послушание исполнивый.

Радуйся, не токмо ланиту, но и выю врагу повергий.

Радуйся, наше несказанное радование.

Радуйся, изумление святых.

Радуйся, яко слезы твоя суть небесное ликование.

Радуйся, яко молитва твоя источает Божественный свет.

Радуйся, преподобне отче наш Далмате, Исетский чудотворче.

Кондак 10

Якоже не может светильник под спудом светити, но светит всем, иже в храмине суть, привлече благодать Божия к тебе, авво и похвало Исетская, многия ищущия спасения, да с ликом святых воспоют: Аллилуия.

Икос 10

Яви тебе, отче наш незабвенне, Господь новаго чудотворца стране нашей Сибирстей, да сложит с себе при ногу твоею Елигей в знамение примирения шелом и кольчужницу, от них же до последних времен исцеление людие Божие получаше, да воспоют ти:

Радуйся, ходатаю и заступниче наш пред Господем.

Радуйся, умолителю Его.

Радуйся, источниче неистощимыя радости.

Радуйся, благодатию твоею покрываяй вся концы.

Радуйся, отче богомудрый и вселюбимый.

Радуйся, иноков наздателю честный.

Радуйся, стадо свое премудре собравый.

Радуйся, многия и многия спасый.

Радуйся, аки кокош птенцы своя согреваяй.

Радуйся, повсюду благочестия лампады возжегий.

Радуйся, вся повеленная тебе от Господа сотворивый.

Радуйся, паче солнца всех освещаяй.

Радуйся, преподобне отче наш Далмате, Исетский чудотворче.

Кондак 11

Ревностью благодарения к Царице Небесной распаляем, устроил еси обитель Успения Ея, и якоже новаго Афония вразуми Елигея и привлече его к милосердию, да молитвами иноков просветится страна, прежде ненасеянная, и яко кедр иже в Ливане возвысится к высоте духовней, и достизает Небес безпечальная песнь: Аллилуия.

Икос 11

Не презри, отче, убожества нашего, поелику не возмогаем достойное благохваление тебе принести, како нечестивыя паки брань на тя воздвигли суть, како чудесне спаслся еси от пожарища, его же чрез поганых змий изрыгнуше, желая поглотити обитель твою, колико страдания и печали понесл еси, напоследок труды непостижныя, да возсияет обитель твоя, яко некий новый Иерусалим, да поем ти:

Радуйся, старче достоблаженный.

Радуйся, угодниче Христов преусерднейший.

Радуйся, игумене, Богом данный обители сей.

Радуйся, стадо свое смирением пасый.

Радуйся, строителю богомудрый и многочудесный.

Радуйся, иноче простый.

Радуйся, лествицы духовныя суровое прохождение.

Радуйся, Креста Господня носителю святый.

Радуйся, монашескаго жития земли нашея светозарное начало.

Радуйся, Царствия Небеснаго светильниче драгий.

Радуйся, отче доброзрачне и досточудне.

Радуйся, царя земнаго о нуждах обители зовый.

Радуйся, преподобне отче наш Далмате, Исетский чудотворче.

Кондак 12

Всяческая устрояяй, якоже прежде реченный Антоний, вместо себя сына своего блаженнаго Исаака над братией постави, якоже Феодосия оный, вновь удалися к созерцанию молитвенному, да не изгладится небесная твердь богописанною скрижалию: Аллилуия.

Икос 12

Чудеса твоя и исцеления даже доселе изливаются, отче наш Далмате, но яко фимиам истончеваясь в старчестве твоем, отшел еси ко Христу своему в селения райския; тамо же лицем к лицу молиши Господа Сил о нас, недостойных чадех твоих, да вси, видящи славу твою, неустанно восхваляем тя:

Радуйся, красото всея земли Сибирския.

Радуйся, небесный человече и ангеле земный.

Радуйся, знамения и чудеса показавый нам.

Радуйся, из глубины падения нашего скоро возведый.

Радуйся, Царствия Небеснаго достойное пребывание.

Радуйся, скоро в молитвах послушающий нас.

Радуйся, отступником грозное обличение.

Радуйся, от бездны греховныя нас извлачаяй.

Радуйся, цельбоносное очищение от всякия скверны.

Радуйся, знамение во благо в последняя времена.

Радуйся, старче, тайною Божией доселе прикровенный.

Радуйся, великий угодниче Христов.

Радуйся, преподобне отче наш Далмате, Исетский чудотворче.

Кондак 13

О, предивный угодниче и старче наш, преподобне Далмате! Призри на люди твоя, с верою и любовию к тебе притекающия и помощи ныне от тебе чающия; изми нас от рабства греховнаго предстательством многочудным твоим и избави вечныя смерти, да с тобою воспоим Богу: Аллилуия.

Сей кондак глаголи трижды, затем икос 1‑й и кондак 1‑й.

Молитва

Преподобному

ДАЛМАТУ Исетскому чудотворцу

О, священная главо, преподобне отче, преблаженне авво Далмате! Не забуди убогих твоих до конца, но поминай нас всегда во святых твоих и благоприятных молитвах к Богу. Помяни стадо твое, еже сам упасл еси, и не забуди посещати чад твоих. Моли за ны, отче священный, за дети твоя духовныя, яко имеяй дерзновение к Небесному Царю: не премолчи за ны ко Господу, и не презри нас, верою и любовию чтущих тя. Поминай нас недостойных у престола Вседержителева, и не престай моляся о нас ко Христу Богу: ибо дана тебе бысть благодать за ны молитися. Не мним бо тя суща мертва: аще бо телом и преставился еси от нас, но и по смерти жив сый пребываеши. Не отступай от нас духом, сохраняя нас от стрел вражиих и всякия прелести бесовския и козней диавольских, пастырю наш добрый. Аще бо и мощей твоих рака пред очима нашима видима есть всегда, но святая твоя душа со ангельскими воинствы, со безплотными лики, с небесными силами, у престола Вседержителева предстоящи, достойно веселится. Ведуще убо тя воистинну и по смерти жива суща, тебе припадаем и тебе молимся: молися о нас всесильному Богу, о пользе душ наших, и испроси нам время на покаяние, да невозбранно прейдем от земли на Небо, от мытарств же горьких, бесов воздушных князей и от вечныя муки да избавимся, и Небеснаго Царствия наследницы да будем со всеми праведными, от века угодившими Господу нашему Иисусу Христу, Ему же подобает всякая слава, честь и поклонение, со безначальным Его Отцем, и с пресвятым и благим и животворящим Его Духом, ныне и присно и во веки веков. Аминь.

Прочитано 871 раз
 

7

2016 Успенский Далматовский монастырь

Календарь